NTOPWA IKUMVA KUKOMA NDI K20 MILLION

Timu ya mpira wamiyendo koma ya amayi ya Ntopwa Super Queens yasaina mgwirizano wa thandizo ndi kampani ya Capital Oil Refining Industries (Cori) yomwe ipereke ndalama zokwana K20 million kwa chaka chimodzi.

Mmodzi mwa akuluakulu akampani ya Kukoma, Violet Kapolo, wati iwo achita izi ngati mbali imodzi yopititsa patsogolo mpira wamiyendo wa amayi mdziko muno. Iye wati timuyi tsopano izitchedwa Kukoma Ntopwa Football Club.

Mkulu wa timuyi, Isaac "Jomo" Osman, anati ndi okondwa ndi thandizoli ndipo wati umoyo wa osewera atimuyi usintha ndipo thandizoli lafika mu nthawi yoyenerera.

Ntopwa inakhala akatswiri a chikho cha mdziko muno cha chaka Chatha ndipo anakayimilira dziko lino ku mpikisano wa CAF Womens Champions league ku South Africa.