MATIMU A SILVER NDI WANDERERS AKUKANA KUKUMANA

Matimu a Mighty Mukuru Wanderers ndi Silver Strikers alemba makalata ku bungwe la Super League of Malawi kuwapempha kuti awachotse masewero omwe bungwe linayika kuti matimuwa akumane lachinayi likudzali.

Matimu awiriwa akhala masabata awiri osasewera masewero kamba koti anatumiza osewera anayi iliyonse ku Flames koma anzawo a FCB Nyasa Big Bullets amasewerabe ngakhale anachita chimodzimodzi.

Bungwe la SULOM latulutsa ndandanda wa masewero omwe achitike mu sabata yachi 13 ndipo matimu awiri amayenera kukumana pomwe sabata yathayi analephera.

Mmakalata omwe asainidwa ndi Roosevelt Mpinganjira kumbali ya Wanderers komanso Gift Mwale Gunde ku Silver ati osewera awo atopa ndipo masewerowa adsaseweredwe mwezi wa mawa. Padakali pano, SULOM sinayankhepo pa nkhaniyi.