MPINGANJIRA WAOPSEZA KUCHOTSA THANDIZO KU WANDERERS

Mtsogoleri wa timu ya Mighty Mukuru Wanderers, Dr Thomson Mpinganjira, awopseza kuti asiya kuthandiza timuyi pompopompo ngati ochemerera atimuyi angapitilize mchitidwe opangira nkhanza osewera atimuyi ngati sanachite bwino.

Mpinganjira wayankhula izi kutsatira kuyendetsa pansi kwa osewera atimuyi ndipo ena analawako makofi pomwe anafanana mphamvu ndi Dedza Dynamos 1-1 sabata yatha.

Iye wati umoyo wa osewera ndi ofunika ndipo akuyenera kutetezedwa.

"Sizinali zabwino poti osewera aja anali pa chiopsezo, zikadzangochitikanso zoletsa osewera kukwera bus yawo, ndidzaleka pompopompo kuthandiza timuyi." Anatero Mpinganjira.

Mkuluyu wakhala akuthandiza timuyi kwa zaka zingapo tsopano ndipo pakadali pano amapereka K410 million pa chaka kudzera mwa kampani ya Ekhaya Foods.