"TIMAYENERA KUWINA MWA NJIRA ILIYONSE" - MTETEMERA

Mphunzitsi watimu ya Creck Sporting Club, Macdonald Mtetemera, wati timu yake imayenera kuwina mwanjira iliyonse mmasewero omwe amasewera ndi timu ya Silver Strikers komabe point imodzi ndi yofunikira kwa iwonso.

Iye amayankhula atatha masewero omwe afanana mphamvu 2-2 pa bwalo la Aubrey Dimba ku Mchinji ndipo wati timu yake inakonzekera zoti ipambane koma anakanika kumateteza zigoli zomwe anagoletsa.

"Anali masewero abwino kwambiri timayenera kupambana mwa njira iliyonse koma zativuta tangokwanitsa kufanana mphamvu kokha tivomereze kuti zatero koma chipambano ndi chomwe timafuna." Anatero Mtetemera.

Iye wati kulakwitsa komwe amachita pa masewero awowa akonza kuti tsopano mmasewero akudzawa ayambe kuchita bwino.

Timuyi ili pa nambala yachisanu ndi chitatu (8) pa masewero 23 omwe yasewera poti yakwanitsa kupeza mapointsi okwana 32 mu ligiyi.