"LIGI SIYINATHE NDIPO TIMENYABE NKHONDO" - KONDOWE

Mmodzi mwa othandizira aphunzitsi ku timu ya FCB Nyasa Big Bullets, Fischer Kondowe, wati ligi siyinathe pomwe timu yake imenyebe nkhondo mpaka kumapeto pomwe adzavomere kuti zatha.

Iye amayankhula atatha masewero omwe agonjetsa timu ya MAFCO 1-0 pa bwalo la Kamuzu ndipo wati timu yake ikadalibe ndi mwayi waukulu kuti atenge ligi ya TNM.

"Ndipo tili ndi chikhulupiliro chonse chochita bwino mu ligi, masewero akadalipo ambiri ndipo ligi siyinathe, ifeyo ngati Bullets timakhulupilira kuti zonse zimatha masewero amu ligi akatha nde timenyabe nkhondo." Anatero Kondowe.

Koma iye anadandaula ndi kayimbilidwe ka masewero awo mmasewerowa kunena kuti oyimbira sakuwateteza osewera awo zomwe zikuchititsa kuti ambiri azikhala ovulala.

FCB Nyasa Big Bullets ikadali pa nambala yachitatu mu ligi ndi mapointsi 37 pa masewero 22 omwe yasewera mu ligi.