"TAPITABE PATSOGOLO TITAPAMBANA" - IKWANGA

Mphunzitsi watimu ya Mzuzu City Hammers, Kondwa Ikwanga, wati kupambana kwawo pa masewero awo ndi Chitipa United kwawathandiza kupita patsogolo mu ligi pomwe tsopano afika pa nambala yachitatu.

Iye amayankhula atagonjetsa Chitipa United 1-0 pa bwalo la Mzuzu ndipo wati ndi wokondwa kamba koti timu tsopano yakwanitsa kuchita bwino itagonja 5-0 ndi Silver Strikers lachinayi lapitali.

"Anali masewero ovuta kwambiri kutengera kuti tikuchokera kogonja koma tiwathokoze osewera athu anachilimika mpaka tapambana, chipambano ichi chatisuntha kwambiri pa ndandanda wa matimu nde tasangalala ndithu." Anatero Ikwanga.

Timu ya Mzuzu City Hammers ili pa nambala yachitatu pomwe ili ndi mapointsi okwana 24 pa masewero 14 omwe yasewera mu ligi.