"CHOMWE TIKUNGOFUNAPO NDI CHIPAMBANO BASI" - CHAZIYA

Mtsogoleri wa osewera kutimu ya Mighty Mukuru Wanderers, Lawrence Chaziya, walimbitsa mtima otsatira a timuyi kuti iwo apeza chipambano pomwe akukumana ndi FCB Nyasa Big Bullets loweruka mu TNM Supa ligi.

Iye amayankhula lachisanu patsogolo pa masewerowa pa bwalo la Kamuzu ndipo wati osewera onse alibwino ndipo molalo ili pamwamba pomwe akufuna kukagonjetsa Bullets.

"Takonzekera bwino kwambiri masewerowa ndipo mu camp mwathu molalo ndi yapamwamba pomwe tikukakumana ndi anzathuwa, chabwino Bullets ndi timu yabwino ifenso ndi timu yabwino koma tikungofunapo 3 points basi." Anafotokoza Chaziya.

Timu ya Mighty Mukuru Wanderers ikuyang'ana chipambano chawo choyamba pamwamba pa Bullets pomwe anayigonjetsa komaliza mu 2021.

Manoma ali pa nambala yachitatu mu ligi pomwe yapezako mapointsi asanu ndi atatu pa masewero anayi.