"ANYAMATA AKUPHONYA KWAMBIRI" - MAKAWA

Mphunzitsi watimu ya Civo United, Abbas Makawa, wati kuchoka kwa Binwell Katinji kutimuyi kwapangitsa kuti asapeze anyamata odalilika ogoletsa zigoli ndi chifukwa chake akuphonya kwambiri mipata yochuluka.

Iye amayankhula atatha masewero omwe apambana 1-0 ndi timu ya FOMO pa bwalo la Civo ndipo wati anali masewero ovuta koma zilibwino poti apambana atagonja masewero atatu.

"Anali masewero ovuta kwambiri, timadziwa kuti avuta chifukwa anyamata ali ndi phuma kamba kophonya mipata komabe ndine okondwa poti tapambana. Mwina panopa tilibe katswiri wokhazikika oti azimwetsa zigoli, anachoka Binwell Katinji sitinapeze mlowammalo nde tiphunzitsabe omwe tili nawowa afikaponso." Anatero Makawa.

Timu ya Civo tsopano yafika pa nambala yachikhumi ndi chimodzi (11) pomwe yapambana kawiri ndi kugonja katatu ndipo ili ndi mapointsi asanu ndi imodzi (6).

"TIKUPHONYA MIPATA YOCHULUKA" - MAKAWA

Mphunzitsi watimu ya Civo United, Abbas Makawa, wati timu yake inaphonya mipata yochuluka yomwe yachititsa kuti agonje pomwe amakumana ndi Kamuzu Barracks.

Iye amayankhula atatha masewero omwe agonja 2-1 ndi timu ya KB ndipo wati timu yake inayesetsa kuti achite bwino koma wawamvetsetsa anyamata ake ndipo akonza.

"Anali masewero abwino kwambiri, tasewera bwino ndipo mipata tinayipeza koma chikusowa ndi kungogwetseramo mu golomo koma awanso ndi anthu, amakhala ndi zofooka ndipo tawamvetsetsa tikonza kuti tichite bwino mmasewero akudza." Anatero Makawa.

Iye anadandaulanso ndi kayimbilidwe ponena kuti oyimbira amapanga ziganizo zokomera KB ndipo iye sanakhutitsidwe nazo.

Timu ya Civo ili pa nambala 11 pomwe yatolera mapointsi atatu okha pa masewero anayi omwe yasewera.

"OMWE ANATISANGALATSA SABATA YATHA NDI OMWEWA" - MAKAWA

Mphunzitsi watimu ya Civo United, Abbas Makawa, wati akhale akuwalimbikitsa osewera ake kuti ayambirenso kuchita bwino poti ndi osewera ake omwewa omwe anapambananso sabata yatha.

Iye amayankhula atatha masewero omwe agonja 3-0 ndi Moyale Barracks pa bwalo la Mzuzu lero ndipo wati akonze monse molakwika kuti mmasewero ena azachitenso bwino.

"Lero zativuta tagonja kwambiri koma mwina tikanatha kupamba mu chigawo choyamba chomwe taphonya kwambiri koma zimachitika tiwalimbikitsa anyamatawa poti ndi omwewa omwe anatikondweretsa sabata yatha nde tiyesetsa." Anatero Makawa.

Timu ya Civo yayamba motsimphina mu ligi ya chaka chino pomwe yapambana masewero amodzi ndi kugonja awiri ndipo ali pa nambala yachisanu ndi chitatu (8).

"TIKUFUNIKA KUTI ALIYENSE AZIGOLETSA" - MAKAWA

Mphunzitsi watimu ya Civo United, Abbas Makawa, wati akulimbikitsa osewera ake onse kuti azikwanitsa kupeza zigoli ndi cholinga choti asamataye mipata yochuluka kuti azipambana masewero.

Iye amayankhula patsogolo pa masewero awo ndi Moyale Barracks kumathero a sabatayi pa bwalo la Mzuzu ndipo wati timu yake ikufunikira kukagoletsa zigoli zambiri kuti akapambane.

"Akhale masewero ovuta kutengera kuti tonse tili ndi ma pointsi atatu komanso kuti iwo ali pakwawo komabe takonzeka. Tikufunitsitsa kukapeza zigoli zambiri poti mumapambana ngati mukugoletsa nde titakagoletsa zambiri anzathu nkupeza mwina chimodzi ndekuti tikachita bwino nde tikufuna aliyense azitha kupeza zigoli ndekuti Civo ikondwa." Anatero Makawa.

Timuyi ili pa nambala yachisanu pomwe ili ndi mapointsi atatu pa masewero awiri ndipo masewero athawa inagonjetsa Dedza Dynamos 3-0.

"TINAYICHENJERERA DEDZA KUTI TICHITE BWINO" - MAKAWA

Mphunzitsi watimu ya Civo United, Abbas Makawa, wati chigoli cha msanga chinawathandiza kuti achite bwino ndipo ndi wokondwa kamba kopambana.

Iye amayankhula atatha masewero omwe apambana 3-0 ndi Dedza Dynamos ndi zigoli za Kelvin Kadzinje, Muhammad Biason komanso Emmanuel Savieli ndipo wati awalimbikitse osewera ake kuti azichitabe bwino.

"Anali masewero ovuta koma tinawachenjerera anzathuwa pomwe chigoli cha msanga chinatithandiza kwambiri kuwafoola koma tachita bwino, ku Mzuzu sabata yatha tinasewera bwino koma kuphonya nde lero tinawalimbikitsa, inde taphonya koma chipambano timachifuna Kwambiri." Anatero Makawa.

Timuyi tsopano ili pa nambala yachiwiri mu ligi ya TNM pomwe yatolera mapointsi atatu pa masewero awiri omwe yasewera.