"SITINALI BWINO BASI" - MZUNGA

Wachiwiri kwa mphunzitsi watimu ya MAFCO, Jimmy Mzunga, wati timu yake yakanika kuchita bwino mmasewero awo kamba koti sanali bwino mmasewerowa.

Iye amayankhula atatha masewero omwe agonja 3-0 ndi Dedza Dynamos ndipo anagoletsetsa mu mphindi 40 za mchigawo choyamba koma iye wati pompano sizintha.

"Tagonja zoonadi, sizinali bwino sitinali bwino kuchoka pachiyambi mpake tagonja. Tikuona mavutowa ndipo tikonza." Watero Mzunga.

MAFCO ndi imodzi mwa matimu omwe sanapezebe chipambano mu ligi ya 2024 pomwe agonja katatu ndi kufanana mphamvu kawiri kuti akhale ndi mapointsi awiri pa masewero asanu ndipo ali pa nambala 15.

"TINAPHONYA KWAMBIRI MIPATA YATHU" - MZUNGA

Wachiwiri kwa mphunzitsi watimu ya MAFCO, Jimmy Mzunga, wati timu yake iyambe kuchita bwino posachedwa kamba koti mavuto omwe akuwaona mmasewero awo oyambawa akuwakonza.

Iye amayankhula atatha masewero omwe agonja 5-1 ndi timu ya Silver Strikers ndipo iye wati timu yake inakanika kugoletsa mipata yomwe anapeza mpake agonja kotere.

"Tasewera bwino kwambiri koma mipata yomwe tinapeza sitinagwiritse ntchito pomwe anzathuwa anachinya yawo nde tikuphunzirabe ndithu, tikabwerera ku zokonzekera zathu tikakonza." Anatero Mzunga.

Timuyi tsopano yatsika kufika pa nambala 14 mu ligi ya TNM pomwe ili ndi mapointsi awiri okha pa masewero anayi omwe asewera ndipo agonja kawiri ndi kufanana mphamvu kawirinso.

"MAPENATE AWIRI TIKANAPATSIDWA" - GONDWE

Mphunzitsi watimu ya MAFCO, Stereo Gondwe, wati timu yake ikanatha kupatsidwa mapenate awiri mmasewero omwe amasewera ndi Baka City koma oyimbira anaona mosiyana.

Gondwe amayankhula atatha masewero omwe afanana mphamvu 0-0 ndi Baka City ku Karonga ndipo wati kusakhals bwino kwa bwaloli komanso ziganizo za zoimbira zina zakanikitsa kuti apambane.

"Anali masewero abwino kwambiri mwina tinasewera bwino koma bwaloli madzi ndi kuterera zinatikanikitsa kuti mwina tisewere mpira wathu koma kuchoka ku Salima kudzatenga point imodzi ndi zabwinonso. Mwina tikanatha kupeza mapenate awiri osewera wathu anagwetsedwa koma oyimbira anayimba kona tingovomera kuti ndi mmene anaonera." Anatero Chirwa.

Zateremu, MAFCO ili pa nambala 12 mi ligi pomwe yakwanitsa kutenga ma points awiri pa masewero atatu omwe yasewera.

"NDAKHUTIRA NDI ZOTSATIRAZI" - GONDWE

Mphunzitsi watimu ya MAFCO, Stereo Gondwe, wati wakhutira ndi zotsatira zomwe timu yake yapeza pomwe yafanana mphamvu 1-1 ndi timu ya Kamuzu Barracks pa bwalo la Chitowe loweruka.

Gondwe anati timu yake inayesesa mpaka kupeza chigoli nthawi yothaitha ndipo akukhulupilira kuti akhale akuchita bwino mu masewero apatsogolo pawo.

"Anali masewero ovuta tithokoze Mulungu kuti tapeza point imodzi. Anzathuwa anachinya patali kwambiri ndipo zimaoneka ngati zitivuta koma sitinatope, tinayesetsa mpaka tinapeza chigoli kutatsala mphindi zitatu." Anatero Gondwe.

Timu ya MAFCO tsopano ili pa nambala 11 ndi point imodzi yomwe ayipeza atasewera masewero awiri mu ligi.

"TAKONZEKA MMENE TIMACHITIRA NTHAWI ZONSE" - GONDWE

Mphunzitsi watimu ya MAFCO, Stereo Gondwe, wati timu yake yakonzeka mmene imachitira pa masewero aliwonse ndipo alibe phuma lopambana masewero.

Iye amayankhula patsogolo pa masewero omwe akumane ndi Kamuzu Barracks loweruka ndipo wati iwo asewera mmene amachitira nthawi zonse.

"Takonzekera mmene timapangira nthawi zonse anyamata alibwino ndipo mawa agwira ntchito. Chipambano amapereka ndi Mulungu nde masewero angoyamba kumene tilibe phuma lililonse." Anatero Gondwe.

Timuyi inayamba ligi ya chaka chino moipa pomwe inagonja 2-1 ndi asilikali anzawo a Moyale Barracks sabata yatha.