"TIKAKHAZIKIKA TIZIPAMBANA MASEWERO" - CHIRWA

Mphunzitsi watimu ya FOMO FC, Gilbert Chirwa, wati timu yake imangopanga zibwana zing'onozing'ono zomwe zachititsa kuti agonje masewero omwe amakumana ndi Kamuzu Barracks.

Iye amayankhula atatha masewero omwe agonja 3-1 pa bwalo la Champions ndipo wati tsopano akapeza luntha losewerasewera mu ligiyi ndikukhazikika ayamba kuchita bwino.

"Zoonadi timangochita tizibwana mpake anzathu amachinya zigoli nde ndi zodandaulitsa koma tikuyenera tiphunzire kuti muligi mulibe chisoni nde Poti nkoyamba ambiriwa kusewera ligiyi tikuphunzira ndipo tikakhazikika posachedwapa tiyamba kupeza zipambano tsopano." Anatero Chirwa.

Timu ya FOMO tsopano yagonja kawiri motsatizana ndipo inakwanitsa kupeza chipambano mmasewero oyamba ndipo ili pa nambala yachikhumi ndi mapointsi atatu.

Game yavuta

"WAMKULU AKACHOKA AKULIRA PA MULANJE" - FOMO

Mkulu woona za malonda ku FOMO, Daniel Mbebuwa, wati timuyi ili ndi mapointsi asanu ndi imodzi kale angakhale kuti sanasewere ndi Mighty Mukuru Wanderers ponena kuti Manoma akachoka manja ali mkhosi.

Iye amayankhula patsogolo pa masewero a matimuwa omwe achitike pa bwalo la Mulanje lamulungu ndipo wachenjeza a Wanderers kuti akonzekere mikango yolusa yokhayokha.

"Ndiwauze kuti sabata yatha tinamasula mikango yaimuna yokha koma apa tikamasula yaimuna ndi yaikazi ndipo akonzeke kudzathamanga, wamkulu adzachoka akulira chifukwa Pano ndi pamanda." Anatero Mbebuwa.

Iye wamema anthu kuti akhamukire ku bwaloli poti kudzakhalanso kugulitsa kwa unifolomu ya timuyi patsikuli.

Timuyi ikuchokera kopambana 1-0 ndi Bangwe All Stars ndipo inakumana ndi Manoma chaka chatha mu Castel Challenge ndipo Wanderers inapambana 1-0.

FOMO YAPEZA CHIPAMBANO CHOYAMBA

Timu ya FOMO yapeza chipambano chake choyamba mu ligi ya TNM pomwe yagonjetsa timu ya Bangwe All Stars 1-0 pa bwalo la Mulanje masana a loweruka.

Hassan Luwembe anamwetsa chigoli pa mphindi 77 za masewerowa kuti timuyi ipambane ndipo mphunzitsi wawo Gilbert Chirwa anati ndi okondwa kamba kopambana masewerowa.

"Ndine wokondwa poti tapambana masewerowa ndipo analidi ovuta koma tinawauza anyamatawa kuti alimbikire mpaka anapeza chigoli, Pali ma dera omwe sitinachite bwino koma tikonza mavutowa kuti kupita chitsogolo tipitilire kuchita bwino." Anatero Chirwa.

Timuyi yalowa kumene mu ligiyi ndipo yapanga mbiri popambana masewero awo enieni oyamba mu ligiyi. Timuyi ili pa nambala yachitatu mu ligi ndi mapointsi atatu.

"AKHALA MASEWERO OVUTA KWAMBIRI" - CHIRWA

Mphunzitsi watimu ya FOMO FC, Gilbert Chirwa, wati masewero awo ndi timu ya Bangwe All Stars masana a loweruka akhale ovuta kwambiri koma anyamata ake akonzeka.

Chirwa amayankhula patsogolo pa masewerowa pomwe wati nkofunikira ndikuyamba ndi chipambano kuti akhazikike bwino mu ligi ya TNM.

"Molalo ndi yokwera kwambiri anyamata akonzeka mmasewerowa chilichonse tapanga chatsala ndi choti tikaonetse pa bwalo la zamasewero. Akhala masewero ovuta kwambiri poti Bangwe ndi timu yabwino komabe tikufunika tiyambe ndi kupambana," Anatero Chirwa.

Timu ya FOMO ikhale ikusewera masewero awo oyamba mu ligiyi poti kakhala koyamba kusewera mu ligiyi. Masewerowa Ali pa bwalo la Mulanje lomwe pakhomo pa timuyi.

Wolemba: Hastings Wadza Kasonga Jr